Ji saleke nû, bi hêviyên nû silav li we be xwînerno.
2022 ji bo kovara me The Hall Kurdiyê saleke bi ber bû. Kovara me bi piştevaniya we xwînerên ezîz û bi keda nivîskarên me yên dilxwaz her meh bi hejmareke nû, têr û tije weşiya. The Hall Kurdî di 2023an de jî wê bêsekin rêwitiya xwe bidomîne û xizmeta kovargeriya Kurdî û zimanê Kurdî bike.
Bergê hejmara yekem ya sala nû pîrozbahiya sersalê ye. Piştî 2 salên ku ji ber pandemiya kovîdê mirov li seranserê cîhanê dûrî şahî, bihevrebûn pêkvexebatê mabûn û di sersalên 2021 û 2022an de piranî li malên xwe mabûn, xelkî îcar sersal bi coş pîroz kir. Nexasim mirovên li Londona paytextê Îngilîstanê. Zêdetirê 100 hezar kesî li Londonê çûn seyra şahiya sersalê. Agahî û wêneyên wê şevê di nûçeya me de ye.
Li Londonê Kurdên Elewî jî bi awayên xwe sala nû pîroz kir. Kevneşopa Kal Û Gaxan ku tê wateya oxirkirina salê û pêşwazîkirina sala nû, hat pîroz kirin.
Ji Keyaniya Yekbûyî mijareke din jî karberdan e, di gelek sektoran de karker grevê dikin. Xirabûna aboriyê derbeke mezin li debara wan kiriye û ew jî ji hikûmetê daxwaza zêdekirina mehaniyan ya bi qasî rêjeya enflasyonê dikin. Karberdan niha yekemîn û girîngtirîn mesele ye di rojeva vî welatî de.
Nivîskar, rewşenbîr û dîroknasê Kurd Konê Reş ji arşîvên xwe çîroka reng û bijartina Alaya Kurdistanê derxist. Gelo we dizaniya, cara yekem Alaya Rengîn di sala 1919an de di civîna Komeleya Kurdistan Tealî de Li Stenbolê bi reng û şiklê xwe hatiye qebûlkirin.
Nivîskar Necat Zivingî di vê hejmarê de li ser hikmetên jimara 7an nivîseke gelek xweş û bi ber hazir kiriye. Jimarolojî: Hêlîna heft Eyloyan. Zivingî dibêje “Heft”, di sembolîzasyona gelek milet û neteweyan de heye. Lê ne bi qasî ya Kurdan. Çine ew? Ji bo hînbûnê vê gotarê teqez biwînin.
Bloggera delal û serkeftî Salomé Cizrawî li ser helbestvan Arthur Cravan nivîsî. Di sernavê gotarê de ji Cravan wek helbestaneke serserî tê behskirin. Lê gelo ew bixwe kesekî çawa ye? Bersiv di nivîsa Salomé de ye.
Xelkê cihû bi jiyan û serkeftinên xwe mînakeke hêja ne ji bo me Kurdan. Antropolog Welat Ramînazad ji mînaka Eliezer Ben-Yehuda behsa vê mijarê kiriye. Binêrin ka li hember beredayîçûn û nebûna pêşeroja kedê çareseriya Eliezer Ben-Yehuda çi ye.
Di rojên dawîn yên 2022an de mixabin li ser Kurdên me yên li Parîsê êrîşeke xirab hate kirin. 3 can beriya ku sala nû bibînin li ber çavên rayedarên Fransî hatin qetilkirin. Li ser pêkhatina êrîşê, protestoyên bi girseyî û encamên vê bûyerê rojnameger Sîmon Suleymanî bersiv da pirsên me.
Dîsa di sala çûyî de rûdaneke din a girîng jî pêşketina di xebatên fûzyonê de bû. Zanîstan axirî gihîştin armanca xwe û bi fûzyonê zêdetirê maliyeta wê enerjî bidest xistin. Ev tiştekî gelek bi zehmet û bi maliyet e. Lê di xebatên fûzyonê de konaxeke krîtîk hate derbas kirin. Ev tên çi wateyê? Digikurd ji bo xwînerên me nivîsî.
Û nivîsek din ya zimanzan Abdullah Încekan: Heidegger, Ayetek û Kurd. Fîlozofê navdar Martin Heidegger dibêje “Mala hebûnê ziman e“.
Bi hêviya ku 2023 bibe sala Kurdan û zimanê Kurdî.
1 saliya The Hall Kurdîyê pîroz be!
Bimînin di xweşiyê de.
