Li Londonê piştî 2 salan cara ewile ku ji bo sersalê pîrozbahiyeke wiha bi coş hate kirin. Li doraliya çemê Thamesê zêdetirî 100 hezar kesî ji bo dîtina fîşekên hewayî û showên taybet bo pêşwazîkirina sala nû, kom bûn. Tam 12 hezar fîşekên hewayî hatin avêtin û ev şahiya rengîn bes 12 deqeyan dewam kir. Roja yekam a 2023an de jî li Londonê New Year’s Day Parade (meşa roja yekem a sala nû) hate lidarxistin. Ji 20 welatan 8 hezar kes bi cil û bergên xwe yên taybet di vê meşê de hazir bûn.
Şahiya Fireworks
Gava saet bû 12ê şevê zingila Big Benê lê da. Li ser vê şahiya fireworksê jî dest pê kir.
London amadehiyeke taybet ji bo vê sersalê kir. Lewra ji ber pandemiya kovîdê di 2 salên borî de an pîrozbahî tunebûn an jî bi beşdariyeke gelek kêm hatibûn kirin û gel bi pirranî li malên xwe pêşwaziya sala nû kiribû. Ji ber van sedeman îsal eleqe gelek baş bû û tevî ku temaşekirina fîşekên hewayî li ber çemê Thamesê bi peretî bû, dîsa jî zêdetirê 100 hezar kesî li vê show û şahiya bêhempa temaşe kir.
Di van şahiyan de Keybanû Elizabeth a Duyem jî hate bibîranîn. Bi dronan ewil mohra wê, dûv re jî şiklê rûyê wê ya li ser pereyan li hewayê hate nexşkirin.
Dronan piştî şiklê keybanûyê peyama sersalê jî nivîsand. “2023 with love from London” (2023 Ji Londonê Bi Hezkirin)
Şahiya bi fîşekên hewayî jî piştî koreografiyên dronan dest pê kir. Şahiya fireworks 12 deqeyan dewam kir û 12 hezar fîşekên hewayî hatin teqandin.
Şaredarê Londonê Sadiq Khan diyar kir ku ev mezintirîn şahîye li Ewropayê.
Herwiha serfiraziya tîma jinan ya futbolê ku Kupayê Euro yê qezenç kiribûn jî hate bibîranîn.
Dîsa ji bo piştvaniya Ukraynayê jî London Eye bi rengên Alaya Ukraynayê hate ronîkirin û fîşekên hewayî yên Şîn Û Zer hatin avêtin û strana Kalush Orchestra ku Eurovisiona qezenç kiribû hate lêdan.
London New Year’s Parade
Meşa Roja Yekem a Sala Nû li Londonê kevneşopeke gelek girîng û rengîn e. Ji sala 1987an vir ve tê lidarxistin. Lê ji ber pandemiyê 2 sal navber hatibû dayîn. Îsal ev meş bi beşdariyeke mezin, bi coş û rengîn pêk hat.
Ji 20 welatan beşdarî çêbûn.
8000 hunermend/lîstikvan meşiyan. Di nav wan de reqsvan, bandoyên meşê, kesên bi kincên Key û keybanûyan lê bûn, hebûn.
Her netew bi kinc û taybetmendiyên çanda xwe meşiyan.
Li kêleka rêyan 800 hezar kesî li meşê temaşe kir.
Ev meş li televîzyonan jî zindî hate parve kirin û dora 500 milyon kesî jî lê temaşe kir.
