Di saet 8ê êvara şeva 2yê Îlonê de li ser ezmanên Kurdistanê meteor ket. Meteor gava ket ezmanên tarî bi carekê biriqî û ezman kesk bû.
Piştî çend salan careke din li welêt meteorek asîman ronî kir. Di şeva tarî de meteor gava ket ezman bi keskahiyê ronî bû. Meteor gava ket dinyayê bi carekê agir pê ket û piştî çend saniyeyan jî ket erdê. Dema ketina meteorê li çend bajarên welêt hat dîtin.
Meteor an jî bi kurdî kevirên asîmanî yek ji perçeyên gerstêkan in. Carna jî dibin avakerê gerstêrkan. Zanyar dibêjin meteora ku ketiye Amedê dibe ku perçeyeke gerstêrkekê ye ku NASA pê dizane.
Di sala 2015an de dîsa meteor ketibû Çewlîgê. Wê demê perçeyên meteorê ji aliyê NASA’yê hatibû sertîfakirin. Lewra qîmeta wan hebû. A niha nayê zanîn bê ka ev meteor ji kîjan gerstêrkê ye. Li gorî dîmenên ajansên fezayê meteor ketiye devera Amed û Çewlîgê. Ji gel herêmê tê xwestin ev perçeyên kevirê asîmanî bila radestî zanîngehan bikin.
Bi kevirên asîmanî di zanistê de gelek pêşveçûn çêdibe. Lewra her yek ji wan derbarê gerdûnê de agahî dide me.
Wekî din ji bo kesên ku perçeyên meteorê bibîne dibe ku xelata pereyî jî bê dayîn.
Meteor gava dikevin bi taybetî ji ber tesîra oksîjenê agir bi wan dikeve. Lewra kevirê ziwa û cemidî jî dest bi şewatê dike.
Meteora ketî li ser medyaya civakî belav bû. Gelek dîmen hene ku di dema dawetekê de meteor dikeve. Lê tevî meteorê govenda mêvanan dewam kir.
